Gihangop sa mga opisyal sa Commission on Election (Comelec) dinhi sa Sugbo ang pagkatudlo ni Justice Jose Melo isip bag-ong chairman sa Comelec.
Gibutyag ni North District Election Officer Marchel Sarno kompiyansa sila sa taas nga kasinatian ug katakus ni Melo nga maoy modumala sa Comelec.
Gani nagtuo si Sarno nga nunot niining pagkatudlo ni Melo isip bag-ong Comelec chairman malimpyohan niini ang nadaot nga imahen sa Comelec.
Gitumbok ni Sarno ang pagkalubong sa kontrobersya sa Comelec dihang nabulgar ang Hello Garci issue, ang giingong pagpanikas sa milabay’ng 2004 election ug ang pagkalambigit ni kanhi Comelec Chairman Benjamin Abalos sa nakontrobersyal nga ZTE broadband deal.
Gibutyag ni Sarno nga nagkinahanglan og ligdong nga lider ang Comelec nga maoy modumala niini aron malimpyohan niini ang tanang mga negatibong impresyon sa publiko.