Opisyal nga piloto sa Philippine Air Force nabiktima sa hit and run human kini madasmagi og pribadong sakyanan didto sa Ouano Avenue sa Mandaue reclamation area sa milabay’ng gabii.
Ang biktima mao si PAF Capt. Arnold Ando, usa ka piloto nga nadestino sa Mactan Benito Ebuen Airbase sa dakbayan sa Lapulapu.
Base sa imbestigasyon ni SPO1 Henaro Lambayan sa Mandaue Traffic Division nasuta nga samtang luwan si Capt. Ando sa iyang motorsiklo padung sa dakbayan sa Sugbu mga 8:15 sa milabay’ng gabii usa ka pribadong multicab color puti ang kalit kini nga midumbol kaniya.
Gumikan niini nahiagum si Ando og bali sa iyang mga tudlo lakip na ang mga bun-og ug samad sa iyang kalawasan human kini malamba sa maong dalan.
Gidali usab dala si Ando sa Mandaue City Hospital ug luwas na kini sa makuyaw nga kahimtang, samtang hangtud ning pagsuwat sa balita wala pa gihapon hisayri sa kapolisan sa Mandaue ang responsableng sakyanan nga midumbol ni Ando.