Nailhan na ang usa ka batan-ong lalaki kinsa giingong maoy usa sa duha ka suspetsado nga mitulis sa Mactan Rural Bank sa Sitio Iba, Barangay Basak, dakbayan sa Lapu-Lapu sa miaging Biyernes nga nahitabo atol sa translation sa imahen ni Señor Santo Niño ug Birhen sa Guadalupe.
Ang pipila ka mga saksi nga gisukit-sukit sa kapolisan maoy nag-ila sa maong mga batan-on kinsa mao usab ang ilang gibasehan sa pagkuha og carthographic sketches.
Si SPO2 Andres Doque sa Criminal Investigation nga nahinabi sa Banat News miingon nga natigayon ang pagkuha og carthographic sketches sa duha ka tulisan pinaagi sa pipila ka mga saksi sa maong insidente.
Mokabat sa kapin sa P500,000 ang salapi nga nasakiyo sa maong mga tulisan gikan sa Mactan Rural Bank kinsa dali usab kaayong nakasibat pahilayo sa maong lugar.
Matud ni Doque nga nagpabilin pa gihapon nga wala pa mailhi ang duha ka tulisan nga pulos mga batan-on diin ilang gibana-banang anaa na sa hingkod nga panuigon.
Apan nagdumili pa sa pagbutyag ang kapolisan sa tukmang pangalan sa maong duha ka tulisan kinsa nagpabilin pa nga gawasnon hangtod niining mga panahona.
Padayon karong gihugtan sa mga polis ang paghimo og pakisusi batok sa maong mga suspetsado.
Nunot sa maong hitabo ang direktor sa kapolisan sa siyudad Police Superintendent Louie Oppus nakigtagbo sa mga tagdumala ug representante sa mga Rural Bank sa dakbayan alang sa pagpalambo sa ilang security system.