Sobra sa 40 ka panimalay ang naugdaw human sa nahitabong sunog sa duha ka mga sitio sa Barangay Banawa ning dakbayan mga alas 2:50 kagahapon sa hapon.
Si Esmael Codilla Firemarshal sa dakbayan sa Sugbo nga gikahinabi sa Banat News mibutyag nga naigo sa maong sunog mao ang Sitio Kanaas ug Sitio Riverside diin ila kining gipaubos sa general alarm.
Matud pa ni Codilla nga ang sunog nakontrolar sulod sa 48 minutos gikan sa ilang pag-alarma apan walay gikatahong mga naangol niini. Gibutyag ni Codilla nga base sa ilang pagsukit-sukit sa mga residente sa maong dapit nasayran nga plansa nga wala mapawong maoy nakaingon sa sunog.
Gikatahong didto gikan sa panimalay sa giilang Marlyne Romeo ang kalayo hinoon ang maong taho dili pa nila kompirmado sa oras niining pagbalita gumikan kay ang ilang mga imbestigador padayon pa sa pagpahigayon og imbestigasyon ug pag-clearing sa lugar.
Subay niini wala pa usab sila matino sa kabomberohan kun pila gyud ang danyos sa maong sunog.