Gituman sa mga lokal nga opisyal sa kagamhanan sa lalawigan ang awhag sa Kapitolyo ug sa Regional Disaster and Coordinating Council (RDCC) nga pasidan-an ang mga molupyo sa daplin sa kasapaan sa dakong peligro ning panahon sa ting-uwan.
Matud pa ni Mayor Teresito Marinas sa lungsod sa Barili nga human ibanlas sa baha niadtong Biyernes ang tulo ka panimalay didto sa barangay Maigang, Barili, iya dayong gimandoan ang mga silingan niini sa pagpabakwit sa luwas nga dapit sa panahon sa ting-uwan.
Kini human madawat ang mga kamandoan gikan kang Gobernador Gwendolyn Garcia nga kinahanglang atimanon pagpahibawo ang mga molupyo sa daplin sa kasapaan sa kalit usahay nga pagbaha mugna sa pagbundak sa kusog nga uwan karong panahona.
Ingon usab niini ang gimando ni Neil Sanchez, tigpamaba sa RDCC nga gikinahanglan kaayo ang dinalian nga pagpabakwit sa mga nanimuyo sa daplin sa kasapaan kun mokusog ang uwan aron kalikayan ang pagkaangin sa ilang kinabuhi.
Gibase sa mga kadagkoan sa kagamhanan ang ilang pasidaan sa mga pahibawo sa mga tinugyanan sa Philippine Atmospheric Geophysical and Astronomical Services Administration (PAGASA ) sa padayong pag-uwan-uwan karon nunot sa panahong gitawag nga inter tropical convergence zone.