Matud ni Cebu Provincial Police Director Senior Supt. Carmelo Valmoria nga ikadismaya sa mga polis nga nakabaligya na sa gisaad nga dugang Christmas bonus nga P3000 kay dili na mahinayon og hatag ang gisaad ni Presidente Gloria Macapagal Arroyo sa tanang empleyado sa gobiyerno kay dili mominos sa P10,000.
Kini tungod kay ang Philippine National Police dili makahatag og dugang pundo nga P3000 para ipuno sa P7000 nga maoy ihatag sa Department of Budget and Management (DBM) subay sa mando ni Arroyo.
Gipahibawo ni Arroyo niadtong nilabay'ng Disyembre nga tag P10,000 ang bonus alang sa mga empleyado sa gobiyerno nga niserbisyo og di mokuwang sa upat ka buwan hangtod Nobiyembre 30, ug ang P7000 magagikan sa Department of Budget and Management (DBM) samtang ang P3000 anha kuhaon sa pundo sa ahensya nga ilang gitrabahoan
Ang Philippine National Police mipagawas og memorandum nga dili mahatagan og insaktong tag P10,000 ang mga polis gumikan kuwang ang pundo.
“Be informed further that the PNP does not have savings to support the remaining P 3000,” ang nakalatid sa memorandum nga gibasa ni Valmoria.
Ang maong kausaban nakahimo og kagubot sa mga polis ilabi na sa mga nagkupot og ranggo ug sa mga polis nga gigarantiya na daan ang dawatonon ug nagdahum nga makadawat og P10,000 nga maoy gisaad sa presidente.