Higpit nga gimanduan sa kadagkuan sa edukasyon sa lalawigan sa Sugbu ang mga magtutudlo nga dili gyud pugson ang mga tinun-an sa elementarya ingon man sa sekondarya sa pampublikong tunghaan sa pagsalmot sa Sinulog grand mardi gras.
Si Department of Education Provincial Director Ricardo Borgonia nga gikahinabi sa Banat News miingon nga duna na silay memorandum nga gipatuman niini sa tanang tunghaan sa probinsya sa Sugbu.
Matud pa niini nga ang pagsalmot sa tinuig nga pagsayaw sa Sinulog isip halad sa balaang bata nga si Sr. Sto Niño ila kining gi- encourage, apan wala magsabot nga pugsanay.
Gipasabot niini nga ang paapilon lang sa maong Sinulog ipaagi lang kini sa “voluntary basis” niadtong mga bata nga ganahang moapil sa pagsayaw sa Sinulog.
Gipahibalo niini nga aduna na karoy upat ka contingent sa probinsya gikan sa elementarya nga naglangkob sa Cordova, Consolacion, Alcoy ug Madredijos.
Samtang lima usab sa sekondarya nga naglangkob sa Oslob National High School, Sta. Felomina High School ug St. Peters Academy nga pulos gikan sa lungsod sa Alegria, Carmen National High School ug ang Liloan National High School diin pulos adunay tag 60 ka mga individual nga dancers.