Ang matag tiket sa jackpot price sa 6\49 sa superlotto nga mokabat sa P10 kaniadto mapalit na karon sa kantidad nga P20 sugod kagahapon Huwebes, sumala pa sa Philippine Charity Sweepstake office.
Si William Medici, general manager sa PCSO Central Visayas nga nahinabi sa Banat News mitataw nga ang superlotto nga 6/49 lamang ang giusbawan ang presyo sa matag tiket sanglit namatikdan man usab sa kadagkoan sa PCSO nga maoy sagad paliton sa mga tawo tungod sa dakong ganti niini.
Nunot sa pagpausbaw sa PCSO sa matag tiket ang ganti sa superlotto nga nagsugod kaniadto sa P8 milyones ang kantidad karon gidoble ngadto na sa P16 milyones hangtod ngadto P100 milyon kapin ang kantidad sa ganti.
Giusbawan usab ang ganti sa 3 digit sa superlotto gikan sa P60 ngadto sa P100, ang 4 digit nga gikan sa P800 ngadto na sa P1,000 ug ang 5 digit gihimo na usab nilang P56,000 gikan sa P28 milyones ang ganti.
Giklaro ni Medici nga ang 6\45 ug 6/42 sa lotto sama gihapon ang kantidad nga mapalit sa P10 ang matag tiket apil na ang swertres nga 3 digit sa lotto.