Gihan-ay na ni Atty Clarence Paul Oaminal, abogado sa Philippine Drug Enforcement Agency ang mga dokumento ni Bernard Liu, labot sa hinabang nga ihatag sa kagamhanan sa dakbayan sa Sugbu.
Si Oaminal nga gikahinabi sa Banat News mitug-an nga iyang gitabangan si Liu sa pag-fill up sa porma nga gihatag sa City Hall alang sa ayuda niini.
Matud pa niini nga ang maong porma gihatag sa city hall sa bulan sa Disyembre ug iyang gipanghinaot nga ila kining maduso karong unang semana sa Enero.
Gipasalamatan usab niya sila si Mayor Tomas Osmeña, Konsehal Pe tsirman sa committee on drugs sa konseho sa dakbayan, ingon man si kongresista Antonio Cuenco nga milantaw sa kahimtang ni Liu.
Kini tungod kay bisan sa nadelatar ang ubang mga abag kang Liu, apan naabot na gyud kini karong mga panahuna nga labaw pa sa pinaskuhan sa kanhi state witness sa congressional injury batok sa managsuong negosyante nga sila si Wellington ug Peter Lim labot sa pagpalusot og ilegal nga drugas diha sa tugpahanan sa Mactan pipila na ka tuig ang nakalabay.
Matud pa niini nga ang pagpakabana sa maong mga opisyal labot sa pagkumbate sa ilegal nga drugas makapaikag usab kini niadtong ubang mga tawo nga adunay kasuyuran sa maong ilegal nga kalihukan.