Babaye ug usa ka minor de edad nasikop sa kapolisan sa Lapulapu atol sa gipahigayong buy-bust operation didto sa Purok Rambo, Barangay Babag, dakbayan sa Lapulapu sa milabay'ng gabii.
Ang nasikop mao sila si Lydia Agusto Ybañez alyas Liding, 53, dalaga ug usa ka 17 anyos nga lalaki mga residente sa maong dapit.
Ang buy-bust operation gipangulohan kini ni PO3 Rodino Amistad sa Operation Section ug CIIS sa kapolisan sa dakbayan sa Lapulapu diin sa maong operasyon wala makaipsot ang duha human kini magtambayayong sa pagbaligya og drugas sa decoy sa kapolisan.
Nakuha sa posesyon sa duha ang usa ka gamay'ng plastik nga sudlanan nga adunay sulod nga 15 ka mga gagmay'ng pakete sa gituhuang shabu, P560 cash nga gituhoang halin sa pagpamaligya og drugas, gamit sa pagsuyop og shabu ug ang marked money nga balor P100 nga gigamit atol sa buybust operation.
Matud pa ni PO3 Amistad dugay na silang gipahibalo nga namaligya og ginadiling drugas ang mga suspetsado ug sa dihang ila kining gipanid-an ug nakompirmar ang maong kalihukan ila dayon kining gihimoan og buy-bust operation nga miresulta sa pagkasikop ni Ybañez ug sa 17 anyos nga lalaki.
Ang mga ebidensiya gisumiter pa ngadto sa PNP crime laboratory alang sa konpirmasyon ug ang kaso giandam pa kini sa mga operatiba sa kapolisan sa Lapulapu alang sa pagpasaka niini ngadto sa piskaliya.
Samtang ang duha ka suspetsado magselebrar sa Bag-ong Tuig sa detention cell sa kapolisan sa Lapulapu gumikan kay sa Huwebes pa sunod tuig mapasaka ang kasong kalapasan sa RA 9165 ubos sa Sec. 5 kun pagpayuhot ug pamaligya sa ilegal nga drugas.