Hugot ang pagtuo ni Comelec Provincial Supervisor Atty. Lionel Marco Castiliano nga usa ka Sugbuanon ang sunod nga matudlo nga chairman sa Commission on Election (Comelec) karong bulan sa Pebrero sunod tuig.
Kini nunot sa gitakda nga pag-retiro sa katungdanan ni Acting Comelec chairman Ressureccion Borra unya sa petsa 2 sa bulan sa Pebrero sunod tuig.
Gumikan niini gipaabot nga motudlo og bag-ong Comelec chairman si Presidente Gloria Arroyo human unya sa pag-retiro ni Borra.
Tungod niini nagtuo si Castiliano nga usa ka Sugbuanon ang sunod nga molingkod nga chairman sa Comelec tungod kay dugay nang panahon nga walay Sugbuanon nga nilingkod isip dakong opisyal sa maong ahensya.
Giangkon ni Castiliano nga mas dako sila og bentaha kun usa ka Sugbuanon ang magsilbing chairman sa Comelec tungod kay masayon lang alang kanilang mga opisyal sa Comelec dinhi sa Sugbu ang pagpaabot sa mga problema ug panginahanglan alang dinhi sa Sugbu.
Nasayran nga si kanhi Chief Justice Hilario Davide,Jr. ang katapusang Sugbuanon nga natudlong Comelec chairman sa wala pa kini mahimong labaw sa korte suprema pipila ka tuig na ang nilabay.
Ang unang Sugbuanon nga natudlo sa maong posisyon mao si Atty. Regalado Maambong ang amahan ni board member Victor Maambong.