Mikunhod og 73.33 porsiyento ang mga insidente sa pagpamusil dinhi sa dakbayan sukad nga nadakpan si Aristotle “Ares” Aves sumala pa sa pangangkon ni Sr. Supt. Patrocinio Comendador, director sa Cebu City Police Office.
Si Comendador mitug-an sa mga tigbalita kagahapon nga mitala lang og upat ka mga kasong pagpamusil duha ka semana human madakpi si Aves samtang kinse ka tawo ang gipusil duha ka semana ang milabay una pa madakpi si Aves.
Wala hinuon ipasangil ni Comendador ang tanang 15 ka nanglabay nga kaso ngadto lang kang Aves.
Ang 73.33 porsiyento gibase ni Comendador sa 15 ka pagpamusil sulod sa duha ka semana sa wala pa madakpi si Aves ug gikumparar ngadto sa duha usab ka semana human sa pagkasikop niini nga mitala ra og upat ka kasong pagpamusil.
Sigun pa ni Comendador nagpasabot lang kini nga dako og impact ang pagkasikop kaniya ug dunay mensaheng nahatud ang kapolisan ngadto sa publiko ilabi na sa mga tawong duna say planong mamusil.
Mibalik nga dunay nareport nga pagpamusil sa dakbayan niadto lang Disyembre 6. si Aves nadakpan niadtong Disyembre 3 sa gabii diha sa Pier 8 sa dakbayan sa Mandaue.
“Nakita nato nga dako og impact, although it’s too early to say nga sa 15 days period nga siya maoy responsible ana pero siguro ang mga tawo nakakita nga there was really an effort from the police apprehending topnotch or notorious hitmen. Sa amo lang pag-analyze sa polis mura og nag-send og message to those who are into shooting somebody that the police will surely be going after them,” asoy pang Comendador.
Wala hinuon angkona ni Comendador nga ang pagkasikop kang Aves ug sa mga kaubanan pinaagi lang sa polis kundili nagpakita kini nga milihok gyud ang mga polis batok sa ilang grupo.
Si Aves ug wala pa mailhing mga kaubanan niini maoy gitumbok nga suspek sa pagpamusil sa duha ka mga Hapones nga sila si Hiroshi Kusaka, Taro Suda, Roland Teves, Armand Panit, Wilson Yu ug ingon man ang mga biktima a drive-by shootings.
Si Comendador nagkanayon nga dunay 25 ka kasong gipasaka na batok kang Aves diha sa Cebu City Police Office wala pay labot niini ang kaso sa illegal nga drugas ug sa armas.
Matud pang Comendador sa pagkakaron dunay walo ka kasong murder, 13 ka frustrated murders, tulo ka attempted murders, samtang ang ika-25 mao ang pagpasaka unya sa kaso may labot sa pagpatay kang Panit kinsa gipusil patay diha sa dalan D. Jakosalem niadtong Septiyembre 29.
Duna pay laing kaso si Aves diha sa Mandaue City nga gikatakdang ipasaka na usab ning pipila ka mga adlaw.