Hugtanon gipanghimakak ni Aloguinsan Vice Mayor Augustus Caesar Moreno ang pamasangil sa pundok sa mga mananagat ug militanting pundok nga nanglabay og mga toxic waste diha sa ilang lungsod ang Japex Inc. gikan sa nagpadayong oil exploration niini karun diha sa Tañon Strait.
Ang Fisherfolks Development Center Incorporated (Fidec) pinaagi ni Vince Cinches mipasangil atol sa gipatawag niining press conference sa miaging adlaw may labot sa pagpanglabay og toxic waste gikan sa gipahigayung oil exploration diha sa maong lungsod.
Hinuon gi-angkon ni Moreno nga dunay mga gipanglabay nga sagbot gikan sa nagpadayun nga oil exploration diha sa dumping site sa ilang lungsod apan dili kini toxic waste kon dili mga drill cuttings kini.
Giklaro sa bise mayor nga dili tinuod ang pasangil nga makahatag og hulga sa panglawas sa publiko ang maong mga hinabwa nga basura gikan sa maong oil exploration tungod kay nasubay kini sa lagda sa Department of Environmant and Natural Resources (DENR).
Giklaro usab ni Moreno nga labaw nang dili tinuod ang pasangil nga nagbutang og protective mask ang mga tawo nga gisugo pagpanglabay sa maong hugaw diha sa ilang dumping site sa barangay Poblacion tungod kay usa lang kadto ka personal protective equipment nga maoy sagad gamiton sa ingon niini nga mga kalihukan.
Gipasabot ni Moreno nga subay sa gihatag nga Environmental Compliance Certificate (ECC) sa DENR gi-obligar kini pagbutang og lapok nga hanig sa mga hugaw nga ilabay niini diha sa dumping site ug ang ibabaw tabunan og tarpolin.
Apan matud sa bise mayor mas labaw pa niini ang gihimo sa mga kawani sa Japex tungod kay inay tabunan lang og tarpolin ang mga basura gisemento pa gyud niini aron pagsiguro nga dili kini makamugna og baho.
Nasayran nga ang FIDEC inabagan sa IBP-Cebu Chapter,simbahan ug Cebu Chamber of Commerce gitakda kining mosang-at og petisyon direkta sa Korte Suprema nga nag-awhag pagpahunong sa nagpadayun nga oil exploration sa Tañon Strait nga alang nila nakahatag og dakung kadaut sa kadagatan sa maong lugar.