Laing Toyota Innova sa Mobile Patrol Group ang nagusbat human masugamak na usab og aksidente diha sa kadalanan nga nakaguba usab sa laing pribadong sakyanan niadtong milabay’ng gabii diha sa eskina sa dalan P.del Rosario ug Osmeña Blvd.
Ang nabanggaan sa pribadong sakyanan mao ang patrol car 017 nga gimaneho niadtong tungura ni SPO1 Godofredo Villarin uban sa duha ka polis, samtang ang nakabangga kanila mao ang Toyota Sedan nga may plakang XSG-210 nga gimaneho ni Danilo Enriquez, 25, taga dalan Mustang sa dakbayan sa Lapulapu.
Ang Innova padulong palang sa South Reclamation Properties subay sa dalan P.del Rosario niadtong tungura dihang nakasigpat og duha ka lalaking sakay og motorsiklo nga may mga giluklok nga armas sa ilang mga hawak diha sa usa ka dakong unibersidad sa maong dalan.
Ang maong motorsiklo gikatahong mi-beat sa traffic lights ug midiretso sa dalan N.Bacalso maong miarangkada ang patrol car paggukod niini samtang nag-siren ug nag-blinkers bisan niabante na ang mga sakyanan diha sa dalan Osmeña Blvd.
Diha-diha misampak ang sedan ni Enriquez sa tuong pultahan sa luyo sa maong patrol car hinungdan sa pagkaguba sa maong mga sakyanan, wala hinuoy gikareport nga may naangol sa insidente.
Dili momenus unom na ka aksidente ang nasugamakan sa mga sakyanan sa Mobile Patrol Group ginamit ang maong sakyanan samtang nagresponde ug ang usa samtang gigamit sa personal nga lakaw sa crew niini.
Niadto lang milabay’ng semana, usa ka ginang ang naangol ug naguba ang usa ka patrol car nga Innova hasta na ang Volkswagen sa ginang ug sa iyang bana dihang sila nagsungag diha sa Fuente Osmeña samtang miresponde og susamang alarma ang mga polis.