Ang kaisog ug pagpakigbisog alang sa kagawasan maoy nahinumduman ni Cebu City Councilor Arsenio Pacaña atol sa pagsaulog sa ika-144 ka tuig nga kasumaran sa adlaw’ng natawhan sa bayaning si Andres Bonifacio kagahapong adlawa.
Si Bonifacio giila nga mao ang amahan sa rebulosyon sa Pilipinas nga nakigbatok sa mga Katsila nga nisakop sa nasod pipila ka siglo na ang nakalabay.
Matud sa konsehal nga bisan og walay nasinati nga hulga ang Pilipinas sa mga langyaw nga buot moilog sa nasod karon apan mas gikinahanglan niining panahuna nga ipabilin ang hiyas ni Bonifacio sa mga Pilipino alang sa kaangayan.
Kini tungod usab sa mga bag-ong hagit sa modernong panahon nga giingong nanginahanglan og kaisog nga gipakita ni Bonifacio kaniadto.
Ang mga bag-ong hagit nga gitumbok ni Pacaña mao ang hulga sa kalikupan, drug addiction ug labaw sa tanan mao ang mga sakop sa fraternity nga giingong mohunos og kinabuhi sa walay kapasikaran ug sa walay pagtan-aw nga dunay maangin nga mga sibilyan.
“Like Bonifacio we should have that nationalism ba nga dili ta makatugot nga gawngan sa dili maayong mga buhat,” sumala ni Pacaña.
Nabalaka si Pacaña nga kung dili mahatagan og kasulbaran ang maong mga suliran, maulipon ug maalaot usab unya ang katawhan sa nasod.
Wala usab palabya sa konsehal ang paghatag og komentaryo sa nahitabong standoff didto sa Makati City nga gipasiugdahan nila ni Senador Antonio Trillanes IV ug kaubanan.
Alang kang Pacaña wala na kinahanglana sa senador ang maong buhat tungod kay kini usa na ka piniling opisyal sa nasod.
Si Trillanes nga kanhi sakop sa Magdalo group sa militar, dismayado na sa nagdala sa renda sa kagamhanan.