Gihulipan sa katungdanan ni Senior Superintendent Rodel Calungsod, officer-in-charge sa Mandaue City Police Office (MCPO) isip hepe sa Presinto 5 sa Opao Police Station si Inspector Pat Padaon.
Si Inspector Padaon kinsa gikataho nga maoy mohulip sa kanhi puwesto nga gihuptan ni Inspector Ramon Villar isip hepe sa Intelligence and Investigation and Management Bureau ang pagahulipan ni Senior Inspector Oscar Monterroyo.
Si Senior Inspector Monterroyo gikan sa Presinto 4 sa Casuntingan Police Station isip hepe ang pagahulipan usab sa mao niyang katungdanan sa opisyal nga gikan sa headquarter sa MCPO.
Ang paghulip kang Inspector Padaon ni Senior Superintendent Calungsod natigayon human usab ireklamo ang tulo niya ka mga sakop nga giingong nagpabaya sa ilang serbisyo.
Ang tulo kinsa gitangtang usab sa ilang distino sa Presinto ug pagasilotan og pagkasuspenso mao ang naglakip kanila ni PO3 Manolito Labus, PO3 Vicente Gila ug PO1 Rico Senilong.
Ang maong tulo ka mga polis gireklamong nagpabaya sa ilang katungdanan sanglit napakyas kini sa pagtubag sa alarma nga pagpanunggab nga miresulta sa kamatayon sa biktima.
Ang biktima mao si Enrique Torres nga gidunggab mga 30 metros ang gilay-on gikan sa Presinto 5 ug ang nagdunggab mao ang usa ka Andy Baunsit ug kuyog sa usa ka Zaldy kinsa dali usab nga nakasibat pahilayo sa maong dapit.