Nagmalampuson ang mga sakop sa Bayanihan Multi-Purpose Cooperative kon BMPC sa ilang tinguha nga ma-audit ang ilang kooperatiba.
Kini human nimando ang Ombudsman Visayas sa mga opisyal sa BMPC pagduso sa ilang mga dokumento ngadto sa anti-graft office.
Ang mga sakop sa BMPC nga mga kawani usab sa Cebu City Hall pinanguluhan sa labaw sa DMDP nga si Edna Jaca, maoy nangusog nga mahiling ang book of records sa ilang kooperatiba.
Kini tungod sa ilang pagduda nga wala matarong pagdala ang ilang kontribusyon sa mga opisyal sa BMPC sulod na sa pipila ka tuig.
Nagduda usab ang mga miyembro sa nahisgutang kooperatiba nga ang ilang kwarta maoy gigasto sa mga opisyal niini pagbiyahe ngadto sa gawas sa nasod.
Nasagmuyo usab ang pipila ka sakop sa BMPC tungod kay giingong balibaran ang uban niining miyembro nga makahulam og kuwarta tungod sa kakuwang og pundo.
Nisamot ang ilang pagduda dihang nagdumili ang mga opisyal sa kooperatiba pagpa-abli sa book of records sa ilang gihulma nga audit team.
Kini ang hinungdan nga ang nagpakabanang mga miyembro nidangop sa Ombudsman alang sa pagpangayo og assistance.
Ang mga opisyal sa BMPC ug ang nagpakabanang mga miyembro gipatawag sa Ombudsman sa niaging Lunes ug gipahimangnoan ang isig ka habig.
Nagkanayon si Jaca nga sila gitahasan sa anti-graft office nga maoy mulista sa ilang gusto nga mahibaw-an ug ipadangat ngadto sa Ombudsman.
Miingon si Jaca nga ang Ombudsman na maoy mangayo niini ngadto sa BMPC sibo sa mapatik sa ilang isubmitir nga listahan.
Nagtuo si Jaca nga wala nay problema sa nahisgutang arrangement tungod kay giingong walay pagsupak niini ang mga opisyal sa BMPC atol sa pagpatawag kanila sa Ombudsman.