Walo ka tawo, duha niini British national ug laing usa ka polis ang naangol ug nalandig sa tambalanan human maigo sa bolitas sa shotgun sa dihang aksidenteng nakablitan ang gatilyo niini sa guwardiya nga nadestino sa pantalan.
Nahitabo kini pasado alas 7 sa miaging gabii diha sa Sta. Fe Wharf, barangay Talisay, lungsod sa Sta Fe.
Ang nangaangol ug nangalandig sa Bantayan District Hospital giila mao sila si Mario Ilustrisimo, 37, traysikad drayber ug residente sa Poblacion kinsa naigo ang duha niini ka batiis, Relito Illustrisimo, 34, minyo, nagpuyo sa Poblacion, naigo ang duha ka batiis, Christhorey Illot, 30, minyo, residente sa Poblacion ug naigo sa bukobuko ug tuong abaga.
Romeo Ayrosa Jr. 28, minyo, residente sa Poblacion, naigo usab ang duha niya ka paa, John Paul Ilustrisimo, 21, ulitawo, nagpuyo sa barangay Talisay, naigo sa ibabaw'ng bahin sa bukobuko ug wala nga batiis, PO1 Henry Canoy, 37, minyo ug residente sa San Agustine Madredijos ug nadestino sa Madredijos Police Station kinsa naigo usab sa walang abaga, Nephi Simon Pratt, 25, naigo sa walang tuhod, Jissie Anderson, 23, naigo sa walang batiis ug walang siko ang duha nga pulos British national ug temporaryong nagpuyo sa Tickety Boo, barangay Ukoy sa maong lungsod.
Samtang ang nakapusil sa walo ka mga biktima giila sa kapolisan nga si Jesus Esgana Ango, 26, residente sa Sitio San Roque, Pook Sta. Fe ug guwardiya sa Superlights Security Agency ug gidestino diha sa pantalan.
Base sa report nga naabot sa Cebu Provincial Police Office ug base usab sa imbestigasyon sa kapolisan, ang suspek kasamtangang mihimo sa iyang naandang gimbuhaton isip guwardiya diha sa maong pantalan apan kalit lang niya gi-discharge ang giisyu niining usa ka Armscor 12 gauge shotgun hinungdan nga kalit lang kining mibuto ug didto padung sa mga biktima.
Apan gibutyag ni CPPO Director Sr. Supt. Carmelo Valmoria sa mga tigbalita kagahapon kalit lang gi-cock ang shotgun sa suspek apan ang iyang tudlo nakabutang sa gatilyo ug nakablitan hinungdan nga aksidenteng nakabuto ang maong armas.
"Murag daghan kunong mga traysikad ba unya gisamokan seguro ang guwardiya mao to, pag-load nibuto kay ang kamot naa man sa trigger morag bag gi-psywar ang mga drayber sa traysikad," sumala pang Valmoria.
Dugang pang Valmoria ang unom sa walo ka biktima gitakdang dad-on og laing tambalanan sa dakbayawn sa Sugbu apan iyang giklaro nga luwas hinuon sa peligro samtang ang duha ka langyaw nagpabilin sa Bantayan District Hospital.
Matud pang Valmoria ila na lang paabuton ang mga affidavit sa mga biktima aron pormal na nilang mapasaka ang tukmang sumbong batok sa guwardiya.