Labing minos 18 ka mga opisyal ug mga sakop sa board of directors sa Bayanihan Multi-Purpose Cooperative (BMPC) gipatawag sa Ombudsman Visayas.
Kini alang sa usa ka conference nga gitakda karong Nobyembre 26 may kalabutan sa reklamo sa ilang mga sakop.
Ang BMPC maoy kooperatiba sa mga empleyado sa Cebu City Hall nga natukod pipila ka dekada na ang nakalabay.
Ang mga sakop sa BMPC pinanguluhan ni kanhi City Accountant Edna Jaca, gusto nga masayod sa kahimtang sa ilang kooperatiba.
Matud ni Jaca nga gusto nilang masayran kung unsa na ang kahimtang sa ilang kontribusyon pinaagi sa pagpahigayon nila ug accounting.
Apan sumala pa ni Jaca nga nagdumili pagpaabli sa ilang libro ang mga opisyal sa BMPC ilabi na ang ilang manager nga si Danilo Ortiz.
Tungod niini, ang nagduda nga mga myembro nidangop na sa Ombudsman alang sa pagpangayo og assistance.
Nagtuo si Jaca nga pinaagi sa pagpanginlabot sa anti-graft office mapugos na ang mga opisyal sa BMPC pagpahiling sa libro niini.
Apan midugang si Jaca nga kung dili gihapon maminaw ang ilang mga opisyal sa notisya nga gipadangat sa Ombudsman niini, sila mapugos na pagdangop sa hukmanan.
Mitumaw ang katahap sa mga sakop sa BMPC nga dunay irigularidad sa pagdumala sa ilang kooperatiba, human sila makakuha ug kopya sa pipila ka rekord niini.
Ilang nasuta nga dunay mga opisyal sa BMPC nga makapila na mi-loan sa usa ka tuig nga way gipatong nga interes.