Wala mahimuot si Bise Mayor Michael Rama sa paghatag og bag-ong assignment sa upat ka mga pulis sa Fuente Police Station nga nalambigit og kontrobersiya sa nangaging mga semana.
Sila si PO2 Bernabe Alegado, PO2 Tremaine Sotto, PO1 Christopher Torregosa ug PO1 Emmanuel Victor Blones gibalhin ngadto sa beat patrol section sa Cebu City Police Office (CCPO) samtang gipaubos sa imbestigasyon.
Kini human pasanginli sa usa ka Noel Tortor nga nagpataka lang og dakop kaniya diha sa barangay Pasil sa walay igong hinungdan, gawas nga ang nahisgutang barangay dili ubos sa Area of Responsibility (AOR) sa Fuente Osmeña Police Station.
Ang bise mayor nga maoy chairman sa Police Coordinating and Advisory Council (PCAC) miingon nga angayang ipahamtang sa maong mga polis ang bug-at nga silot human usab masayod nga ang pipila niini nalambigit na usab og kontrobersiya kaniadto.
“Para nako, the maximum penalty shall be imposed, and if the maximum penalty constituting dismissal, i-dismiss, meantime, kay giimbestigahan pa man kaha na sila, they should be suspended, kay dili man mahimo nga kanang posisyon sa polis duwa-duwaan lang nato, nga kung makasala, ibalhin lang, dili na mahimo, sige ta og balhin og polis, mubalhin usab nang ilang binuang,” nagkanayon si Rama.
Apan alang kang CCPO director Sr. Supt. Patrocinio Comendador, igo na kaniya ang pagrelibo sa nahisgutang mga pulis gikan sa Fuente Police Station, aron dili kini maka-impluwensya sa gihimong imbestigasyon.