Giumol karon sa kapolisan ang Task Force Hiroshi Kasuka alang sa dinaliang pagsulbad sa kamatayon sa Hapon sa duha ka mamumuno nga nagsakay og motorsiklo sa dakbayan sa Mandaue.
Si Sr. Superintendent Rodel Calungsod, ang officer-in-charge sa Mandaue City Police Office (MCPO) nga gikahinabi sa Banat News miingon nga ang task force nga gitukod gilangkoban sa CIDG 7, CIIB ug PNP Crime Laboratory.
Matud pa niya nga siya ang mangulo sa maong task force nga gitukod nga gitumong alang sa pagtinabangay sa paghimo og pakisusi ug sa pag-ila sa mamumuno niini.
Si Calungsod miingon nga ang anggulo sa negosyo gisubay karon. Inisyal nga report nagkanayon nga gi-double cross sa iyang kawani nga Japanese national nga si Tazu Yuki Oda nga nakautang sa biktima og mokabat sa P20 milyones.
Naglakip sa katuyoan sa biktima sa pag-adto sa Manila mao ang pagpaningil sa utang ni Oda apan gipusil-patay kini sa paghidangat sa dalan Ouano sa Umapad sa dakbayan sa Mandaue.
Dugang pa ni Calungsod nga gihimo na nila ang pakisusi sa buhatan sa Bureau of Immigration and Deportation (BID) 7 apan wala matala ang pangalan ni Oda.
Si Calungsod miingon nga ang love triangle nga mga anggulo hingpit na nilang gisalikway sanglit sa ilang pakisusi maoy ilang nasayran nga wala kini makasinati og problema sa iyang kapuyo nga babaye.
Kahinumduman nga niadtong bulan sa Hulyo niining tuiga ang laing negosyante nga Japanese national nga si Taru Soda gipusil-patay usab sa mga tawo nga nagsakay og motorsiklo sa Banilad sa maong siyudad.
Nagpabilin pa nga wala masulbad ang kamatayon sa maong biktima ug ang kapolisan sa maong dakbayan padayon pa gihapon nga naghimo og pakisusi alang sa pag-ila sa mga mamumuno.