Nakadawat na og kamanduan ang Cebu City Comelec Office gikan sa hukmanan labot sa mga election protest sa miaging Barangay ug SK elections.
Ang kamanduan naglatid nga protihian sa Comelec ang integridad sa mga ballot boxes, list of voters, voting records ug uban pa.
Labing minos tulo ka kopya sa election protest ang nadawat ni City Election Officer Attorney Marchel Sarno kagahapong adlawa gikan sa korte.
Kini naglakip sa reklamo sa usa ka Daniel Francis Arguido batok sa midaog nga barangay kapitan sa Mabolo nga si Reynaldo Ompok.
Apan ang gikasurpresa ni Sarno mao ang iyang pagkalakip sa kiha nga gipasaka sa usa ka Edgardo Borces batok sa nidaug nga kapitan sa barangay San Jose nga si Merinisa Arinasa.
Usa sa mga pasangil ni Borces batok kang Arinasa nga kini namalit og mga boto hinungdan sa iyang kapildihan sa niaging eleksyon.
Gawas niini, giakusahan usab ni Borces si Arinasa nga nanghakot og mga flying voters ug giparehistro niini sa Comelec.
Giapil ni Borces si Sarno tungod kay isip election officer, giingong wa kini magpakabana sa mga tawong giparehistro kung kini mulopyo ba sa ilang barangay.
Wala hinoon mabalaka ang election officer sa paglambigit kaniya sa election protest nga gipasaka ni Borces ug andam niya kining tubagon.
Tambag ni Sarno ngadto kang Borces nga dawaton na lang ang kapalaran niini tungod kay giingong nahuman na ang eleksyon ug nisulti na ang mga tawo.
“Natural feelings na sa usa ka pildirong kandidato, pero mas maayong dawaton na lang niya iyang kapildihan kay nisulti na man ang mga tawo” sumala pa ni Sarno.
“Midagan bitaw sila sa eleksyon, naa usab unta silay katakus pagdawat unsay pagbuot sa mga tawo,”dugang pamahayag sa election officer.