Daling gitigom ni Cebu City Schools Division Superintendent Doctor Lorna Rances, ang mga schools supervisor sa publikong mga tunghaan sa dakbayan human mopasidaan si mayor Tomas Osmeña ngadto sa mga magtutudlo ug sa mga tinun-an sa siyudad, nga dili mag-apil-apil sa kalihukan sa nagkaduol na nga Sinulog Festival.
Matud ni Doctor Rances, nga iya nang gipadangat ngadto sa mga supervisor ang pahimangno sa mayor ug kini na usab ang mopahibawo ngadto sa mga magtutudlo.
Giklaro ni Rances nga mahimo lang makasalmot ang mga tinun-an sa Sinulog kung kini magrepresentar sa usa ka civilian sector o kuhaon sa contingent sa barangay.
Apan hugot nga gidid-an ni Rances ang mga tinun-an nga mosalmot sa practice sa sayaw sa mga adlaw nga dunay klase.
“Ang akong giingon nila nga ang tanang mga bata nga mag-practice sa Sabado ra gyod ug Domingo kung tingklase walay practices” sumala pa ni Rances.
“Anyway, silang tanan nga muapil sa Sinulog parehas man sila nga Sabado ug Domingo ra, so, walay maalkanse ana, walay makabintaha” dugang pamahayag ni Rances.
Gitataw ni Rances ngadto sa mga supervisor nga itugyan ngadto sa mga barangay officials ang pag-schedule sa practice.
Labaw sa tanan, ang pagpangita sa gikinahanglan sa contingent sama sa costume ug sa gasto unya niini.
Gipasabot ni Rances nga ang bugtong papel sa mga magtutudlo kung gikinahanglan, mao lang ang pag-coordinate sa mga nagdumala sa contingent.
Dili buot si mayor Osmeña nga musalmot ang mga tunghaan sa Sinulog, tungod sa kabalaka nga maapektahan ang pagtungha sa kabataan sa higayon nga mag-practice.
Gani dili lang sa Sinulog gidid-an ang mga tunghaan sa pagsalmot, lakip na sa ubang kalihukan nga makaapekto sa pagtoon sa mga tinun-an.