Upat ka tawo ang nadakpan sa managlahing anti-illegal drugs operation nga gilusad sa Criminal Investigation and Intelligence Branch niadtong milabay’ng gabii ug kagahapon sa kaadlawon.
Ang pagkadakop natigayon atol sa gihimong saturation drive sa CIIB ug sa City-Anti-Illegal Drugs Special Operations Task Force pinanguluhan ni Sr. Insp. George Ylanan nga miresulta usab sa pagkasakmit sa mga nubain ampules ug gidudahang shabu ingon man usa ka armas.
Ang nangadakpan diha sa sitio Baho sa barangay Calamba giilang sila si Perlito Lacaron, 28, taga dalan A.Lopez sa maong barangay ug Abram Villanueva, 19, residente usab sa nahisgutang dapit.
Ang nakadakop kanila mao ang grupo nila ni SPO1 Filomeno Mendaros kinsa nakakuha og pito ka nubain ampules hinungdan sa ilang pagkaaresto.
Samtang sa milabay’ng Huwebes sa gabii, nasikop diha sa dalan Tormis sa barangay Sambag Uno si Mariano Jesus Go, 45, residente sa dalan G.Ouano sa barangay Alang-alang dakbayan sa Mandaue ug Dennis Narvasa, 29, nga taga Tormis Extension sa nahisgutang barangay.
Ang duha nakuhaan og mga ginamit na nga drug paraphernalia sa pagsuyop og gidudahang shabu diha sa ilang mga posesyon ug sa gihimong inspeksyon sa Honda Sedan ni Go dunay nakuha dugang mga drug paraphernalia ug usa ka kalibre .45 pistolang may tulo ka magazines ug 24 ka buhing bala.