Gimando ni Cebu City Police Office director Sr.Supt. Patrocinio Comendador nga imbestigahon ang upat ka mga polis sa Fuente Police Station kalabot sa giingong iregularidad sa pagdakop nila sa usa ka residente sa Pasil niadtong milabay'ng Oktubre 29.
Ang buot paimbestigaran ni Comendador mao sila si PO2 Bernabe Alegado, PO2 Tremaine Sotto, PO1 Cristopher Bacalso ug PO1 Emmanuel Victor Blones, pulos sakop sa maong police station.
Kini human mireklamo ang usa ka dinakpan nilang giilang si Noel Tortor, 27, kabahin sa giingong minao-mao nga pasangil kabahin sa iyang pagkasikop sa maong mga polis.
Sa joint affidavit sa mga polis sila mialegar nga nakadawat sila og tawag sa telepono gikan sa usa ka wala magpailang concerned citizen kabahin sa presensya sa usa ka armadong tawo diha sa eskina sa dalan Tormis ug P.del Rosario sa barangay Sambag Uno.
Diha-diha ilang gisusi ang maong dapit ug ginamit ang deskripsyong gihatag kanila sa wala magpailang tawo ilang nasigpatan si Tortor ug dihang ilang gisitar ug girekisa nadiskubrehang duna kini gitagoang tulo ka paketeng may sulod nga gidudahang shabu ug usa ka “automatic knife” hinungdan sa pagkasikop kaniya.
Ang maong kaso gipasaka na ngadto sa City Prosecutor’s Office niadtong Oktubre 30. Apan si Tortor mihangyo sa piskalya nga maka-avail sa waiver of detention aron tubagon ang pasangil.
Apan usa ka tigbalita kinsa nagpalit og purified water sa usa ka refilling station diha sa duol sa balay ni Tortor niadtong gabii sa Oktubre 28 mitug-an nga nakahibalo siya sa insidente ug dili tinuod ang naa sa dokumentong gisumitir sa maong mga polis sa piskalya.
Si John Rey Saavedra, associate editor ning pamantalaan maoy unang giduol sa ginikanan ni Tortor aron magpatabang tungod kay dunay mga nakasibilyang mga polis ang misignit sa iyang anak.
Si Saavedra sanglit wala makaila sa maong babaye ug sa anak niining gidakop nagkanayon iyang gitambagan ang inahan sa pagsusi nalang sa San Nicolas Police station tungod kay hurisdiksyon nila ang Pasil, apan nasayran nga wala diay didto ang iyang anak.
Ang inahan ni Tortor miduol usab sa Philippine Drug Enforcement Agency sa pagtuong taga PDEA-7 ang midakop sa iyang anak apan pakyas gihapon hangtud nga nahibaw-an nalang nilang taga Fuente police station ang midakop kang Tortor.
Ang maong tigbalita nagkanayon nga andam siyang pakigkitaan si Comendador aron paghatag sa iyang pamahayag ug midugang nga duna pay laing nakakita sa maong hitabo nga mipadayag nga andam usab mohatag sa ilang pamahayag.
Ang gikwestyon karon mao kun nganong taga Fuente police station ang midakop kang Tortor ug wala say koordinasyon sa PDEA o ba kaha diha sa San Nicolas Police Station.
Si Comendador sa iyang bahin mimando na sa CIIB pagsusi sa pasangil sanglit sumala pa niini una pa maka-operate ang usa ka polis sa ubang hurisdiksyon angayan una silang mo-coordinate sa City Anti-Illegal Drugs Special Operation Task Force (CAIDSOTF).
“Wala man ta mag-disallow nila (police stations) to operate outside of their jurisdiction but they should have coordinated with CAIDSOTF. Kung tinuod man ni nga dunay distortion of facts, they can be criminally charge for perjury,” asoy pang Comendador.
Si Comendador karon miawhag kang Saavedra sa pagluwat og sinumpaang affidavit kabahin sa iyang nahibaw-an sa insidente aron magamit sa imbestigasyon batok sa maong mga polis.
Dako ang pagtuo ni Comendador nga kun mo-execute og affidavit si Saavedra dako ang posibilidad duna pay laing testigos nga mogawas.
Si Supt. Edison Ardaniel, hepe sa Internal Affairs Service sa pakighinabi sa mga tigbalita kagahapon miawhag kang Tortor o ba kaha sa iyang kabanay sa pagsang-at og pormal nga reklamo diha sa iyang buhatan.
“Any citizen nga naay complaint against or who believed he has something to complain against a police officer he may come to our office, either because of the conduct of the arrest or police operation or the procedure of the arrest were followed,” asoy pang Ardaniel.