Gimanduan sa chairman sa Committee on Education sa Hunta Probinsyal ang labaw sa Cebu Provincial Schools Division Supt. Dr. Recaredo Borgonia pagpahigayun og random drug testing ngadto sa mga magtutudlo sa probinsya sa Sugbu nga gidudahang tiggamitan og gidiling drugas.
Si Bolo nihimo niining maong lakang human kini makadawat og report nga dunay daghang mga magtutudlo sagad niini mga lalaki sa kalungsoran sa Sugbu ang nagumon sa pagbisyo og gidiling drugas ilabina gyud sa shabu.
Nunot niini gitakdang ipa-apil ni Bolo sa mga hisgutanan ang pagpahigayun og random nga pagpang- drug test sa mga magtutudlo atol sa ipahigayun nga Provincial School board meeting niini.
Gitinguha sab sa board member nga adto kuhaon sa school board ang gahin nga gastuhon sa pagpahigayun og pang drug test sa mga magtutudlo sa probinsya sa Sugbu.
Hinoon gi-klaro ni Bolo nga kun madayon kining mao niyang lakang gitinguha niya nga magbutang og guidelines nga kadto lang mga magtutudlo nga gi-suspetsahan nga tiggamitan og gidiling drugas ang ipa-drug test.
Kini tungod usab sa kadaku sa gastuhan unya niini kun ang tanang magtutudlo sa probinsya ang ipaubos sa random drug testing.
Gipasabot ni Bolo nga tipik ug kabahin kini sa programa sa gobyerno aron gyud masiguro nga maayo ang panghunahuna ug wala magumon sa dautang mga bisyo ang mga magtutudlo sa publikong mga tunghaan sa Sugbu.