Gihagit ni Cebu City Police Director Sr. Supt Patrocinio Comendador ang nadakpang drug pusher nga si Paulo Calunsag alyas Intot nga pamatud-an na lang ngadto sa korte ang iyang pasangil ngadto sa mga operatiba sa Criminal Investigation and Intelligence Branch (CIIB) nga gi-planted ang nakuhang mga ebidensya nga shabu atol sa maong operasyon.
“Planted mao nay kasagaran nga akusasyon sa dinakpan. Who plant a half kilo of shabu gani ang usa ka bulto is worth P50,000? Asa man tawon ta anang kantidara mangita? Ang final arbiter ana mao ang korte, actually iyang main concern (Calunsag) is how to counter,” matud pang Comendador sa press conference kagahapon.
Matud pang Comendador ang reklamo ug pasangil ni Calunsag kinahanglan barugan ug adto na lang daugon sa korte.
Nasayran sa miaging adlaw ang CIIB nga gipangulohan ni Sr. Insp George Ylanan misikop ni Paulo Calunsag atol sa ronda diha sa J. Fortich St., Banawa, Guadalupe sa usa ka mahalon ug tulo ka andanang panimalay nga gilibotan og siyam ka surveillance camera. Ang kapolisan armado og Search Warrant nga miresulta sa pagkasakmit sa daghang shabu nga mokantidad og dul-an sa P3 milyones ug kuwarta nga P909,000 nga gituohang halin sa pagpamaligya og shabu ug .38 snubnose nga dunay walo ka buhing bala.
Napanglantawan hinuon ni Comendador nga walay pormal structure ang mga druglord o drug pusher tungod kay iyang gihulagway nga lost organization ug walay klarong grupo apan matud niya nga duna gyuy tawo si Calunsag nga iyang gi-organize nga maoy mahimo niyang sugo-sugoon.
Nagtuo siya nga dunay kontak si Calunsag didto sa Mindanao ug kini maoy usa sa tumong karon sa kapolisan pagpangita ug pag-ila nga giingon usa ka Muslim nga maghatdanan og shabu diha sa panimalay sa J. Fortich St., Banawa Guadalupe, dakbayan sa Sugbu.
Natala sa listahan nga level one drug pusher si Calunsag ug makahurot na og duha ka kilo nga shabu kada semana.
Matud pang Comendador base sa report nga ilang nadawat usa ka high level drug pusher si Calunsag.Nasayran nga si Calunsag giaplayan na kaniadto sa CIIB og search warrant ubos pa sa pagdumala ni Sr. Supt Pablo Labra apan na quash sa korte tungod kay daghang pareho nga address nga nakabutang .Mimando si Comendador ngadto ni Sr. Insp Ylanan nga paspasan ang paghimog report labot sa maong kalampusan aron iyang irekomendar ngadto sa Police Regional Office-7 ug Cebu City Council nga mahatagan og medalya ang mga operatiba sa CIIB.
Midungag si Comendador nga gitinuod gyud ang maong pagpangronda nilang Ylanan ug maayong pagka-plano.
Samtang sa iyang bahin si CCPO Deputy Director for Operation Supt Pablo Labra II nagkanayon nga reliable ang impormasyon nga ilang nakuha batok ni Calunsag ug dako ang iyang pagtuo nga mabilanggo kini sa tibuok niyang kinabuhi.