Usa ka bigtime drug pusher nasikop sa Criminal Investigation and Intelligence Branch (CIIB) sa Cebu City Police Office kagahapon sa hapon diha sa J. Fortich St., Banawa, barangay Guadalupe, ning dakbayan.
Gipangulohan ni CIIB chief Sr. Insp. George Ylanan ug Supt. Pablo Labra II, ang mga operatiba armado og search warrant nga giisyu ni Regional Trial Court Branch 19 Judge Ramon Codilla Jr. hinungdan sa pagkasikop sa bigtime drug pusher nga si Paulo Calunsag alyas Intot, 35, minyo ug residente sa nahisgutang dapit.
Ang mahalong balay sa maong drug pusher nga gibanabanang nagkantidad og kapin sa P10 milyones gilibotan sa mga sakop sa CIIB aron masegurong dili makaikyas ang ilang dakponon.
Nakuhang mga ebidensya ang unom ka dagkong pakete nga gituohang ang sulod shabu, 22 ka medium nga pakete, 46 ka gagmay’ng pakete, gibanabanang mobalor og P2 milyones usa ka .38 snubnose nga dunay walo ka buhing bala, usa ka electronic nga timbangan, lainlaing pakete nga walay sulod, siyam ka surveillance camera ug duha ka monitor, usa ka rotating surveillance board, salapi nga lainlain og denominations nga nagkantidad og P909,000 nga gisulod sa mga polis og garbage bag tungod sa kadaghan.
Si Sr. Insp Ylanan nga nahinabi sa Banat News mitug-an nga duha ka semana nilang gihimoan og surveillance ang suspek ug atol sa maong operasyon, ilang naabtan nga nagrepak sulod sa balay sanglit bag-ohay pa nga gideliber ang maong shabu sa usa ka Muslim.
Ang siyam ka surveillance camera gipamutang sa dalan ug diha sa nataran sa tulo ka andanang panimalay sa suspek diin ang ikaduhang andana niini adunay swimming pool.
Ang kuwarta nakuha diha sa kuwarto ug sa ground floor ug ang maong gidaghanon sa kuwarta binayad sa lending, matud pa ni Ylanan.
Apan sa gidaghanon sa kuwarta ug sa shabu nga nakuha, si Ylanan menus ang pagtuo nga binayad sa lending ang maong kuwarta tungod kay daghan kaayog tag P20.
“Nadakpan naman ko, usa na katuig kapin pero na dismiss sa korte” asoy ni Calunsag.
Apan sa dihang gipangutana si Calunsag kun diin gikan ang maong shabu nga nakuha diha sa iyang panimalay, igo lang kining miduko ug wala na motubag sa maong pangutana.
Matud ni Ylanan ang area ni Calunsag diha sa Pasil ug Ermita diin siya maoy supplier og shabu sa maong mga lugar.
Matud pa sa taga CIIB ang usa ka bigpacks sa shabu nga motimbang og 300 grams mahalin og P250,000 ngadto na sa P300,000 “street value” samtang ang medium packs nga motimbang og 5 gramos nagkantidad og P25,000 diin ang tanang shabu nga nakompiskar sa CIIB mokabat ang tanan og dul-an sa tulo ka milyon.
Si Calunsag anaa karon gitanggong sulod sa detention cell sa Cebu City Police Office ug mag-atubang og kalapasan sa Section 11 ug 12 Article 11 sa Akta Republika 9165 ug 8294 tungod sa kalapasan sa Comelec gun ban.