Usa ka pag-ulog-ulog ngadto sa katawhan ang gipadayag ni Presidente Gloria Macapagal Arroyo nga niduso na usab nga ipatuman ang Charter Changes karong mga panahuna gikan sa Presidential ngadto na sa Parliamentary o kaha Federalism.
Kini maoy gipadayag ni Atty. Democrito Barcenas ang kanhi presidente sa IBP-Cebu City Chapter gumikan kay kadudahan kaayo ang motibo sa presidente human nibuto ang 329 milyones dolyares nga ZTE Corp. broadband deal ug ang gibutyag ni Gobernador Ed Panlilio sa Pampanga nga nanghatag og suborno ang Malacañang niadtong milabay'ng Huwebes.
Si Barcenas nga nahinabi sa Banat New miingon nga tataw kaayo nga duha lang ka isyu ang tumong ug tuyo sa Presidente ning maong lakang.
Una niini matud pa niya nga mao ang diversionary tactics sa presidente alang sa damage control sa administrasyon diin ang mga tawo dili na makasunod sa mga insaktong isyung kurapsyon nga gikalambigitan sa mga opisyal sa goberno.
Ug ang ikaduhang punto mao nga dako usab ang posibilidad nga ihinayon kini sa presidente kini alang na sa iyang pagpabilin sa gahom kun mapupos na ang termino sa 2010, diin mani-obrahon nga makapapili kining primero ministro sa nasud.
Nunot niini iyang giawhag ang katawhan nga bantayan ang bisan unsang mga maniobra sa gobiyerno nga tataw nga makapasamot sa kaot-ot sa nasud.