Usa ka nagpailang gwardiya ang gidakop sa nagpatrolyang mga polis nga sakop sa Nightwatch Patrol sa Cebu City Police Office diha sa dalan Colon human kini makit-ing nagbitbit og armas diha sa atbang sa usa sa mga bangko sa maong dapit.
Ang nadakpan giilang si Marjon Quiñanola, residente sa barangay Bulacao ning dakbayan samtang ang midakop kaniya mao sila si PO1 Armand Pacaña ug PO1 Jodan Batucan.
Ang duha ka mga polis kasamtangang nagpatrolya sa maong dapit dihang sa ila na untang pagbalhin og laing pwesto ilang nasigpatan si Quiñanola nga naglakaw diha sa atbang sa maong bangko nga nagbitbit sa usa ka kalibre .38 revolver.
Dihang ila na untang giduol ug gitiunan og armas kalit lang midagan ang suspek palayo ug giduol ang usa ka tawo ug gitunol ang iyang armas apan wala kini dawata sa maong tawo hangtud nga siya naabtan sa mga polis.
Dihang gipangayoan og lisensya sa maong armas wala kini napakitang dokumentos ug nangangkon hinuon nga usa siya ka gwardiya apan wala gihapon siya makapakita og dokumentong makapamatuod niini.
Si Quiñanola gidakop ug gikatakdang pasakaan og kasong paglapas sa Comelec Gun Ban karong adlawa.