Tulo ka mga dalagita nga dad-on na unta sa kauluhan sa usa ka recruiter agi sa Mactan Cebu International Airport naluwas sa mga sakop sa Police Center for Aviation Security (PCAS-7).
Atol sa pagluwas sa tulo ka dalagita, nasikop ang recruiter nga si Rebecca Luciano Estrada, 35, residente sa Doña Conching Apartment sa Meycauayan, Bulacan, sulod mismo sa domestic departure area sa MCIA.
Nahitabo ang pagluwas sa dihang ang inahan sa usa sa tulo ka biktimang dalagita miduol sa mga elemento sa PCAS-7 sa airport sa dihang dad-on na unta ang tulo ngadto sa kauluhan sakay sa eroplano.
Si Teresita Ybañez, taga barangay Gun-ob, dakbayan sa Lapu-Lapu ug inahan sa 14-anyos, miduol sa PCAS-7 ug miasoy ngadto ni SPO2 Henry Guiangan nga lakip sa gidani ang iyang anak nga dad-on didto sa kauluhan aron patrabahuon isip katabang.
Ang 14-anyos nga anak ni Ybañez uban sa laing duha ka dalagita nga nagpangidaron og 16 ug 17-anyos nga lakip sa naluwas sa PCAS-7.
Sumala pa sa asoy ni Ybañez nga ang iyang anak gisaaran nga hatagan og bag-ong sinena, kuwarta ug pasakyon og eroplano.
Human midangop si Ybañez sa PCAS-7, giubanan siya niini sa airport ug siya mismo ang nakakita ug miila sa recruiter nga si Estrada sulod mismo sa domestic departure area sa MCIA.
Atol sa imbestigasyon, nasota sa kapolisan nga walay pagtugot sa mga ginikanan ang pagdala ni Estrada sa duha ka dalagita nga taga Inabanga, Bohol.
Walay lisensiya sa pagpang-recruit si Estrada, sumala pa ni SPO2 Guiangan.
Lakip sa miresponde si PO2 Hazel Aclo sa Women’s Desk Section sa Lapu-Lapu Police Station.
Matud pa ni PO2 Aclo nga dakong kalapasan sa Anti-Human Trafficking Law ang gibuhat ni Estrada.
Si Estrada gibilanggo karon sa Lapu-Lapu Police Station ug nagpaabot nga pasakaan og kaso.
Nagtuo ang kapolisan nga sa mga night bar o mga casa sa kauluhan ang tugpahan sa tulo ka dalagita ug dili ang saad nga himuong mga katabang.