Most wanted sa Masbate nga pito na ka tuig nagtago-tago nasikop sa kapolisan sa Station 3 diha sa sitio Riles sa barangay Basak dakbayan sa Mandaue sa milabay’ng gabii.
Ang nasikop mao si Dandy Tampus, 22, lumad sa barangay Candulawan, Cataingan, Masbate kinsa suspek sa pagpatay sa Sangguniang Kabataan chairman sa barangay Bangko sa Cataingan niadtong 2000.
Matud pa ni PO2 Rodene Fudotan nakadawat sila og impormasyon nga si Tampus anaa magtago-tago sa maong dapit hinungdan sa gihimo nilang ronda uban sa grupo ni SPO2 Juan Calamba.
Ang pagronda gibase sa warrant of arrest nga giluwatan ni Masbate RTC branch 49 Hon. Judge Manuel Sese sa kasong murder diin walay piyansa nga girekomendar sa korte.
Gikataho usab nga si Tampus nalambigit sa mga tulis nga nahitabo sa dakbayan sa Mandaue kini human masikop sa milabay nga mga adlaw ug positibong giila sa mga biktima.
Matud pa ni PO2 Fudotan karon adlawa pormal na kini nga kuhaon sa kapolisan sa Masbate alang sa pagtubag sa iyang kasong giatubang didto.