Gisaway ni Cebu City Councilor Augustus Pe,Jr. ang memorandum sa National Police Commission -7 nga nagmando sa kadagkuan sa Cebu City Police Office pagpahunong og sul-ob sa mga sakop sa Barangay Intelligence Network kon BIN sa t-shirt nga dunay marka nga CIIB.
Alang kang Napolcom-7 director Bernardo Calibo, ang pagsul-ob sa mga BIN og t-shirt nga dunay marka nga CIIB mahimong dakpon ug pasakaan og kasong “usurpation of authority.”
Gibase kini ni Calibo sa Napolcom memorandum 93-009 nga nagmando pagdakop sa mga civilian agents ug pagpasaka og kasong misrepresentation ug usurpation of authority kun magsuot og sinina o uniporme sa polis.
Si Pe nagkanayon nga dili dautan ang pagsul-ob sa mga BIN sa maong mga sinina. “Unsa may naa gud ana? Dili man siguro na sa t-shirt nga gisul-ob kung dili sa binuhatan sa tawo,”sumala sa konsehal.
Matud pa niini angayan lang mopugong ang Napolcom kung kini dunay ihatag nga hulip sa uniporme nga gisul-ob sa mga sakop sa BIN.
Ang konsehal nga maoy chairman sa Committee on Public Order and Safety sa city council, maoy gisangunan ni mayor Tomas Osmeña pagtan-aw sa mga BIN diha sa city hall.