Mokabat sa 21 ka mananagat sakay sa unom ka pumpboat ang gidakop sa miaging hapon sa lungsod sa Santa Fe dihang naaktohan nga migamit og iligal nga pagpanagat sa Hilantagaan, isla sa Bantayan.
Si PO2 Allan Jumaoan ug Municipal Agriculturist Romeo Pasilan sa maong lungsod nga gikuyogan sa ilang mga sakop maoy nakadakop sa mga suspetsado ug gisakmit usab ang mga kahimanan sa ilang pagpanagat.
Sa pagpakighinabi sa Banat News kang PO2 Gabriel Villagaño, ang upat sa mga pumpboat gipanag-iya ni Ricky Villacampa samtang ang laing duha ang gipanag-iya usab ni Roderito Golambot nga taga Sellon, Bantayan.
Matud pa ni PO2 Villagaño nga lakip sa gisakmnit ang mga pukot nga maoy gihimong kahimanan sa pagpanagat nga gitawag og hulbot-hulbot nga maoy hinungdan nga ilang gidakop.
Si PO2 Villagaño miingon nga ang mga suspetsado kinsa giditiner sa ilang detention cell ang nakalapas sa ilang Municipal Ordinance No. 08-2003 ug makabayad kini og multa sa kalapasan niining nahimno.