Labing minos 24 ka stalls sa mga sidewalk vendors diha sa dalan Colon sa siyudad sa Sugbu ang gitakdang i-demolish karong adlawa.
Kini maoy gibutyag ni Vicente Mercado, hepe sa Squatters Prevention Encroachment and Elimination Division (SPEED).
Ang nahisgutang mga vendors nga mga sakop sa Cebu City United Vendors Association (CCUVA) anaa naninda kilid sa Gaisano South.
Matud ni Mercado nga ang management mismo sa tindahan maoy mireklamo batok sa mga sidewalk vendors tungod usab sa giingong himuon niining expansion.
Posible hinuong mahatagan og lugway ang gikatakdang demolisyon sa Speed sa nahisgutang mga manindahay.
Kini tungod kay giingong nakakuha ang CCUVA og extension sa demolisyon gikan sa buhatan ni Mayor Tomas Osmeña.
Matud sa presidente sa CCUVA nga si Maria Pino, duna silay dokumento nga pinirmahan sa mayor nga naghatag og lugway sa demolisyon.
“Giaprobahan man ni mayor ang among hangyo nga unya pa sa Agosto 19 ang demolisyon kay nangita pa mi og puwesto nga ilang kabalhinan,” sumala pa ni Pino.
Nagkanayon si Pino nga posibleng wala pa madawat ni Mercado ang kopya sa ilang suwat nga gipirmahan sa mayor.
Tungod niini, si Pino na mismo maoy mopakita ug mohatag sa suwat ngadto sa hepe sa Speed aron dili mahinayon ang gitakdang demolisyon karong adlawa.
Sa kasamtangan, wala pay nakitang puwesto si Pino nga kabalhinan sa iyang mga sakop nga maapektahan sa demolisyon.
Apan masaligon ang labaw sa CCUVA nga dunay bag-ong lugar nga katindahan sa nahisgutang mga sidewalk vendors sa dili pa ang Agosto 19.