Mopatuman og experimental rerouting ang Cebu City Traffic Group sugod karong Lunes alang sa magbiyahian sa Labangon ug Ayala, kon 12L nga rota.
Ang maong lakang kabahin sa traffic management plan sa siyudad pagpaluag sa eskina sa mga dalan V. Rama ug M. Velez lahos na sa Duterte Street.
Base sa gihimong on-site observation sa Citom, namatikdan niini nga ang nahisgutang mga dalan maghuot ilabina sa peak hours.
Ang 145 ka 12L puj units maoy gitumbok sa Citom nga dako og natampo sa panaghoot sa mga sakyanan.
Tungod niini gerekomendar sa Citom ang pagpahigayon og experimental rerouting aron matun-an pa ang maong problema.
Gikan sa barangay Punta Princesa ang 12L nga rota molahos na ngadto sa dalan Tres de Abril, left turn sa Salvador St, right turn sa Katipunan St., right turn sa A. Lopez St., diretso sa Tres de Abril, left turn sa N. Bacalso Ave., left turn sa V. Rama Ave., left turn sa B. Rodriguez St., lahos ngadto sa Fuente Osmeña Rotunda, diretso sa General Maxilom Ave., left turn sa Gorordo Ave., right turn sa Cardinal Rosales Ave., ug mulahos ngadto sa Ayala Center.
Sa pikas bahin, magpabilin hinoon ang naandang agianan sa 12L nga rota inig balik niini gikan sa Ayala.
Gikan sa Ayala mulahos ngadto sa Kapitolyo ang nahisgutang mga PUJ paingon sa Banawa ug balik sa ilang point of origin.
Subay niini, giawhag karon ang mga PUJ driver ilabina sa 12L nga rota pagsunod sa traffic scheme aron dili makahatag og kahasol sa ubang road user.
Lakip nga giawhag sa Cebu City Traffic Group nga mo-obserbar sa rerouting mao ang mga puj operator ug ang sumasakay.