Gihugopan sa mga tawo kagahapon sa buntag ang sports center sa Barangay Tejero niining dakbayan sa Sugbo tungod sa gipahigayong libreng mass feeding ug medical mission sa grupo sa Rotary Club of Cebu South ug Oriental Port and Allied Services Corps.
Si Jing-Jing Cadungog konsehal sa maong barangay uban sa mga opisyales maoy kauban sa grupo sa maong kalihukan.
Si Atty. Tom Riveral presidente sa maong mga orgnisasyon mibutyag sa Banat News kagahapon sa buntag nga ang ilang grupo usa ka non-government organization diin gilangkuban kini sa mga abogado, doktor, polis ug uban nga mga professionals.
Si Superintendent Melvin Gayotin kanhi direktor sa Cebu City Police Office (CCPO) usa sa mga aktibong miyembro sa maong organisasyon nitambong usab sa maong kalihukan.
Sobra sa 1,000 ka mga bata kinsa mga malnourish diha sa lugar ang nakabenepisyo sa mass feeding kagahapon.
Gawas sa feeding program duna say gipahigayong libren medical check-up, libreng pagpangibot sa ngipon, tuli ug mga libreng tambal.
Ang grupo ni Riveral dunay susamang kalihukan matag semana.
Sa milabayng semana ang grupo mibisita sa Barangay Libo lungsod sa Tabogon ug karong Agosto 19 gikatakdang mobisita ang grupo diha sa Barangay Tonggo lungsod sa San Fernando.