Namatay sulod sa tambalanan ang usa ka wala mailhing tawo nga gidudahang isnatser nga gitabangan pagkulata sa mga estambay dihang naaktuhan kining nanglabni og cellphone atol sa pagsaulog sa kapistahan ni Seniora Sta. Ana sa lungsod sa Barili niadtong Huwebes sa hapon diha sa barangay Azucena.
Apan hangtud sa pagsulat ning maong balita wala pa gihapon mailhi sa kapolisan sa Barili ang tawo nga namatay nga gidudahang usa ka isnatser nga gibana-banang nagpangidaron og 20 ngadto sa 30 anyos.
Matud pang PO2 Acelino Ricaplaza sa Barili Police Station nga nahinabi sa Banat News nga ang wala mailhing isnatser gikan sa Poblacion ug nisakay og multicab nga pasaheroan paingon sa siyudad sa Carcar.
Apan sa dihang pag-abot sa nahisgutang barangay kalit lang niyang gilabni ang 1100 nga cellphone nga gipanag-iya sa laing pasahero.
Ang tag-iya sa cellphone daling nakasiyagit ug nangayo’g panabang hinungdan nga ang isnatser daling niambak sa multicab apan sa iyang gikanaogan dunay daghang mga estambay sa maong dapit ug matud pa gitabangan kini sa pagkulata.
Matud ni PO2 Ricaplaza wala na makuha sa iyang kaubang polis nga miresponde sa dapit ang pangalan sa tag-iya sa cellphone kay ang driver sa multicab nipasirit sa pagpadagan biniyaan ang maong tawo.
Usa ka Jose Ricardel Pansacala kinsa barangay kapitan sa Azucena maoy nakakita sa maong tawo human gibiyaan sa mga estambay nga mikulata kaniya ug gi-turn over sa Barili Police Station.
Matud pang PO2 Ricaplaza ang maong tawo maayo pa kaayo sa dihang gihatud sa ilang Police Station apan dili na kini makasulti bisan giunsa nila sa pangutana.
Ilang gihatud sa district hospital aron patambalan ang mga bun-og nga naangkon sa kalawasan apan dangta’g pipila ka gutlo nakabsan sa kinabuhi ang maong tawo sulod sa maong tambalanan.
Nagtuo si Ricaplaza nga posibleng gibunalan og gahi nga butang ang wala mailhing isnatser gawas sa nadawat niining kulata gikan sa mga tawo.
Ang patay’ng lawas tua sa usa ka punerarya sa Dumanjug nga gipanag-iya sa usa ka konsehal sa maong lungsod.