Gibantayan karon sa gobyerno ang mga produktong utanon ug prutas gikan sa ubang nasud sa gawas ilabi na sa China aron pagseguro nga luwas kini sa kemikal nga makadaot sa lawas sa tawo.
Kini ang gibutyag sa hepe sa Agribusiness Division sa Department of Agriculture (DA-7) Christopher Lucero kinsa nagkanayon nga higpit ang pagmatngon sa mga tinugyanan sa kagamhanan sa mga produkto gikan sa gawas nga moabot dinhi pinaagi sa tugpahanan o kaha sa pantalan.
Kasagaran sa mga utanon nga moabot dinhi gikan sa China maglakip sa repolyo, sibuyas ug uban pang mga produkto sa kaumahan.
Matud pa ni Lucero nga ang gitahasan sa pagbantay sa maong mga produkto mao ang Bureau of Agriculture and Fishery Products Standards (BAFPS) nga mohiling sa tanang produktong pagkaon sa kaumahan ug kadagatan nga naglakip sa mga utanon ug mga prutas ug isda gikan sa gawas.
Kauban sa (BAFPS) mao ang taga Bureau of Food and Drugs (BFAD) nga maoy gitahasan pag-eksamin sa mga produktong pagkaon nga ginama sa mga pabrika sa gawas.
Dili pa dugay nadiskobrehan sa BFAD Manila ang mga candy ug biskuwet nga gikan sa China nga giingong may sagol nga formalin.