Walay nakitang kalapasan ang Commission on Election (Comelec) sa gimmick sa pipila ka mga opisyal sa barangay nga nagtinguha nga magpapili sa umaabot barangay ug SK election atol sa nagpadayong registration sa buhatan sa Comelec dinhi sa dakbayan sa Sugbu niadtong Lunes.
May labot kini sa gipanghakot nga mga molupyo gikan sa barangay Mabolo nga nagsul-ob og yellow nga senina nga dunay imprinta sa pangalan ni Kagawad Danilo Arquedo samtang naglinya sa buhatan sa Comelec aron magparehistro.
Si Arquedo maoy usa sa nagtinguha nga mokandidato pagka kapitan sa Mabolo karong umaabot piniliay sa barangay sa Oktubre 29.
Samtang gi-imprinta usab sa luyong bahin sa maong mga senina ang pangalan sa mga kagawad nga giingong line-up ni Arquedo.
Apan gibutyag ni Cebu City Election Officer for the North Marchel Sarno nga walay nahimong kalapasan sa lagda sa Omnibus Election Code ang si bisan kinsa nga mga nagtinguha nga mokandidato sa umaabot barangay ug SK election karong panahona gumikan kay dili paman sila kandidato.
Giklaro ni Sarno nga mo-epekto ang early campaigning kun ang gi-akusahan pormal nang nakasang-at sa iyang kandidatura gumikan kay niining higayona mahimo pa man nga mausab ug dili mohinayon og kandidato ang maong mga hingtungdan.