Walay plano si Mayor Tomas Osmeña nga pasundon ang mga kawani sa Cebu City Hall ngadto sa mga empleyado sa Kapitolyo nga mopahiyom kun moatubang sa ilang mga kliyente.
Ang provincial government hugot karong nipatuman sa maong polisiya ug nibahad nga silotan ang mga kawani nga maaktohang magmug-ot.
Gani nagplano ang kagamhanang probinsyal pagkuha sa serbisyo sa ubang mga kawani niini nga maoy maniid sa ilang mga kauban nga magmug-ot.
Samtang si Osmeña nagtuo nga dili garantiya sa maayong panerbisyo ang pagpahiyom ug midugang og pasiaw nga bisan siya dili makapasar niini gumikan kay siya kanunay man usab nga magmug-ot.
“Mao nay reklamo sa mga tawo nga kanunay lang kong magmug-ot, ako’y unang masilutan ana, ayaw na lang uy,” sumala pa sa mayor.
Alang kang Osmeña igo na kaniya nga mahatagan sa maayong pagserbisyo ang mga tawo nga dunay transaksyon diha sa balay dakbayan.
Dili igsapayan sa mayor nga magmugtok ang mga empleyado sa city hall kung matagbaw lang ang publiko sa gihatag nga serbisyo niini.
“Naa bitaw mga empleyado diha kusog kaayong mongisi, pero daghan sab og kwarta ang hunos kay kurakot man,” dugang paglabtik pa sa mayor nga walay tawong gitumbok.