Upat ka tawo ang patay ug laing 18 ang wala pa makit-i human ang usa ka Ro-ro vessel nalunod sa kalawran duol sa Bondoc Peninsula probinsiya sa Quezon kagahapon.
Base sa taho nga napulo ka tawo ang naluwas gikan sa M/V Blue Water Princess dihang nalunod kini sa nahisgutang lugar 4.7 nautical miles gikan sa kabaybayonan sa lungsod sa San Francisco.
Ang mga sakyanan sa dagat sa Philippine Navy ug mga helikopter sa Philippine Air Force gipaadto dayon sa lugar nga nahitaboan alang sa search and rescue operation.
Si Commodore Manuel Tamondong, hepe sa Philippine Coast Guard sa Lucena nagkanayon nga padayon pa ang rescue operation alang sa 28 ka mga pasahero sa maong barko ug sa mga tripulante niini.
Ang nahisgutang Ro-ro (roll-on-roll-off) vessel nga dunay gibug-atong 483 ka tonelada mibiya sa Lucena City ug paingon unta sa Masbate diin aduna usab kini kargang 14 ka mga sakyanan.
Si Tomandong misalikway nga ang dautang panahon tungod sa bagyong Bebeng ang hinungdan sa pagkalunod sa barko.
Matud sa hepe sa PCG nga ang lugar nga nalunoran sa barko walay gikataho nga signal sa bagyo o tropical depression.
Ang Navy mipadala sa ilang PS-28 craft para moayuda sa rescue operations samtang ang militar sa Southern Luzon Command mipadala usab og mga helikopter.
Sa laing bahin, niadtong Miyerkules ang M/V Super Shuttle Ferry 10 usa ka passenger ferry nga paingon sa Surigao ang natanggong sa lawod dihang ang makina niini napalyar human kini mibiya sa pwerto sa Lilo-an, Southern Leyte.
Base sa taho nga ang makina sa maong barko nadaot dihang nakasugat kini og dagkung bawod duol sa isla sa Sumilon.
Ang PCG mipadala og tugboat nga maoy miguroy sa nahisgutang barko paingon sa duol nga pwerto.