Kolorum ang hapit tanang mga school bus sa mga kolehiyo ug unibersidad sa tunga-tungang Kabisay-an ilabi na dinhi sa Sugbu.
Kini maoy gibutyag sa direktor sa Land Transportation Franchising and Regulatory Board (LTFRB-7) nga si Osmeña.
Matud pa ni Osmeña nga gikinahanglan sa usa ka school bus nga dunay yellow plate tungod kay kini mangolekta usab og plite ngadto sa mga tinun-an.
Apan namatikdan ni Osmeña nga green plate pa gihapon ang mga school bus partikular na dinhi sa dakbayan sa Sugbu.
Sumala pa ni Osmeña nga dunay mga school bus nga dili kanunay mangolekta og plite apan kini giingong giapil na sa bayranan sa matrikula.
Kini gihulagway ni Osmeña nga pagpangilad dili lang sa mga estudyante kun dili lakip na sa gobiyerno.
Tungod niini, gipasidan-an karon sa direktor ang mga kolehiyo ug unibersidad sa rehiyon nga molukat na og prangkisa sa ilang buhatan.
Miingon si Osmeña nga subay sa pagbukas sa klase sugdan usab nila karong buwana ang paggukod sa kolorum nga mga school bus ilabi na dinhi sa Sugbu.
Kini bisan pa man kun dunay maligsan nga mga politiko nga nanag-iya og unibersidad dinhi sa siyudad.