Giawhag sa konseho sa dakbayan sa Talisay ang City Engineering Office sa siyudad nga mopahigayon og action plan para malikayan ang dili maayong epekto sa baha ilabi na niining panahon sa ting-uwan.
Ang konseho miawhag usab sa maong buhatan nga mangayo kini og ayuda sa mga opisyal sa kabarangayan para sa maong plano.
Kagahapon giaprobahan on mass motion sa konseho sa Talisay ang gipasar nga resolusyon ni Konsehal Rodi Cabigas kinsa tsirman sa komitiba sa Public Works and Infrastructure kabahin sa maong sugyot.
Ang kagamhanan sa siyudad nabalaka nga ang mga residente sa ubos nga lugar maapektohan gyud sa baha tungod sa kusog nga ulan.
Usa usab sa gikabalak-an sa kagamhanan mao nga dunay mahitabong pagdahili sa yuta gikan sa bukirang barangay tungod sa quarrying ug development sa mga subdivisions.
Kahinumduman nga ang mga residente sa Talisay mireklamo tungod kay walay klarong drainage system ang siyudad ug panahon sa uwan ang tubig anha mobaha sa kadalanan nga nakahatag og kahasol.
Sa bukirang bahin usab sa dakbayan aduna nay nahitabong pagdahili sa yuta ug aduna na gani nakalas nga kinabuhi sa milabay'ng mga insidente apan hangtud karon ang maong problema wala pa masulbad.