Duha ka gipasanginlang tulisan gidakop samtang laing usa nga giingong kaanggid og nawong sa ilang kauban sa pagpanulis gidakop usab sa kapolisan diha sa Camagayan, ning dakbayan niadtong Miyerkules sa hapon.
Ang nangadakpan sa gihimong follow-up operations giilang sila si Jason Mangigo Batoon,19, residente sa maong barangay; Benjamin Flores taga La Guerta sa barangay Lahug, ug ang ikatulo mao si Neil Rodriguez nga taga barangay Apas.
Sa imbestigasyon sa Mobile Patrol Group, usa ka Maria Chatty Lacamaria, 24, usa ka tinun-an ug residente sa barangay Dapitan sa Cordova maoy nabiktima sa mga suspek.
Si Lacamaria naglakaw diha sa dalan P.Del Rosario dihang giduol sa tulo ka mga suspek ug gitulis diin gikuha sa mga tulisan ang iyang itom nga bag nga gisudlan sa iyang cellphone, kwartang P1,200 ug ang pinalit niyang usa ka kilong grapes.
Ang biktima daling nakasinggit og pangayo’g tabang hinungdan nga gigukod sa mga tawo ang tulo apan si Batoon ray naabtan ug nadakpan nila ni PO2 Rodulfo Bolambao ug PO3 Eric Tajanlangit sa Mobile Patrol Group car 013.
Si Batoon mitug-an nga diha sa Camagayan nagtago ang duha niya ka mga kauban apan wala na nila sila maabti sa dapit. Atol sa pagpangita nasugatan sa kapolisan si Rodriguez nga kaanggid og dagway sa suspek hinungdan nga kini giaresto ug dihang gikapkapan nakuha gikan kaniya ang usa ka syringe, usa ka vial nga “Furosemide” ug usa ka vial sab nga “Tranadol” nga gituuhang regulated drugs.
Pinaagi sa nakuhang impormasyon nasubay sa MPG nga sila si PO1 Norman Rupita ug PO1 Meonik Tajanlangit ang mga kaubanan ni Batoon diha sa La Guerta hinungdan sa pagkasikop kang Flores ug pagkarekober sa bag sa biktima apan wala na kini sulod, samtang usa sa mga tulisan nga giila lang ngalan nga Dodong ang nakaikyas.