Gipaniguro ni Comelec regional director Atty. Rey Rene Buac nga sa dili pa ang Hunyo 30 sa sunod bulan aduna nay ma-proklamar nga mananaog sa pagka-kongresista sa ikaupat nga distrito sa lalawigan sa Sugbu.
Kini maoy giklaro ni Buac apan mag-agad sa resulta sa mga mga election return sa lungsod sa Bogo nga tua na karong mga tungora sa uluhang buhatan sa Comelec alang usab sa paghiling niini kun unsa ka genuine ang mga ER nga gituhoan nga mga tampered.
Matud pa ni Buac nga sa dili pa ang petsa 30 sa Hunyo mahuman na og tuki sa Comelec ang maong isyu.
Samtang subay niini gipanghimakak usab niini ang taho nga wala mahimuot si Atty. Pio Jose Jozon ang Comelec supervisory chairman nga naabot pa ang mga ER sa Bogo sa uluhang buhatan nga pwede ra man untang anhi lang sa Sugbu susihon kun genuine ba kini.
Gipasabot niini nga wala siyay nadawat nga kumunikasyon sa ilang uluhang buhatan labot sa maong isyu, apan iyang gipaniguro nga wala kiniy kamatuoran kini tungod kay kun dunay mga pagduda sa mga ER gikinahanglan man gyud nga silang mga commissioner sa kauluhan maoy molantaw niini tungod kay sila maoy gipaubos sa pagbansay-bansay sa pag-ila sa mga original nga dokumento.