Mohatag og hinabang pinansyal ang kagamhanan sa dakbayan sa Sugbu ngadto sa pamilya sa inahan ug sa tulo ka anak nga naapil pagkasunog sa ilang pinuy-anan diha sa Banawa ning siyudad.
Kini maoy gipahibalo sa chairman sa Committee on Social Services sa konseho sa dakbayan konsehal Gerry Carillo human masayod ug nakurat sa maong hitabo.
Matud sa konsehal nga labing minos 40 mil pesos ang mahatag sa siyudad nga financial assistance ug posibleng sa pagpalubong sa mga biktima.
Gituohang naghikog ang inahan nga si Emma Diaz, 25 anyos, pinaagi sa pagsunog sa kaugalingon nilang pinuy-anan ug miamong sa iyang tulo ka anak.
Ang mga bata nga nalakip pagka-ugdaw sa ilang inahan, mao sila si Rachel, 5 anyos; Devincil 2 anyos; ug Nikki nga giingong walo pa lang ka buwan.
Si Rachel nga maoy kinamaguwangan giingong nadunggan pa sa mga silingan nga miawhag sa iyang inahan ug manghod nga manggawas sa ilang panimay dihang miulbo ang kalayo.
Apan ang mga bata gikataho nga gibadlong ug gipugngan sa ilang inahan hinungdan nga ang mga biktima nakita na lang nga nangapaig human mapawong ang kayo.
Ang nahisgutang hitabo, maoy ikaduha niining tuiga human usab matanggong sa sunog ang usa ka lola, anak ug apo, sud sa usa ka noodle factory diha sa Cogon-Pardo.