Namatay ang usa ka batan-ong habal-habal human dunggaba sa liog og kutsilyo sa iyang pasahero sa barangay Sacsac, lungsod sa Pinamungajan niadtong miaging adlaw.
Ang biktima giila ni PO2 Rolando Navarro nga mao si Ramil Banquiso Guingosa, 22 anyos, ulitawo nga lumolupyo sa maong dapit.
Giila ni P02 Navarro ang suspetsado nga mao si Michael Pugoy Lausa, 18 anyos, ulitawo nga taga barangay Tutay sa maong lungsod.
Si PO2 Navarro miingon nga pasahero sa biktima ang suspetsado ug paghidangat sa maong dapit kalit lang niining gidunggab ang liog niini.
Nakapadagan pa ang biktima sa giluwanan niining motorsiklo pauli sa ilang panimalay ug nagpaninggit og panabang sa iyang mga ginikanan.
Dali nga gidala ang biktima sa Pinamungajan District Hospital apan paglabay sa pipila ka oras nga pag-atiman sa mga doktor kini ang gideklarar nga namatay.
Matud pa ni P02 Navarro nga ilang nadakpan ang suspetsado sa hot pursuit operation nga ilang gihimo ug gibalhog na karon sa bilanggoan.