Dunay nadiskubrehang gidudahang “ghost cop” ang National Police Commission atol sa ilang pagpahigayon og tinuig nga “Oplan Bilang” inabagan sa PNP sa tanang mga miyembro niini dinhi sa Central Visayas.
Si Procopio Gaquit, ang Police Inspector VI sa Technical Service Division sa Napolcom mibutyag niini sa mga sakop sa media kagahapon.
Matud pang Gaquit nga nadiskubrehan nila kini atol sa ilang inspeksyon diha sa Bohol sa wala pa ang pagpahigayon sa eleksyon apan midumili siya sa paghatag og dugang detalye kabahin niini.
Matud pa niya dunay imbestigasyon nga himuon ang Napolcom kabahin niini ingon man ang PNP. Ang mga “ghost cop” dili tinuod nga mga polis o ba kaha kanhi mga polis nga nagdawatan gihapon og sweldo gikan sa gobiyerno.
“ Usa sa Bohol province, dili lang ko mo-mention kinsa ug asa,” asoy pang Gaquit.
Gawas pa niini nakadiskubre usab ang Napolcom nga dunay usa ka polis sa maong lalawigan nga dili na angayang motrabaho sanglit nagsakit na kini ug dili na makahimo pa sa naandan niining responsibilidad isip usa ka polis.
Ang maong polis gikatahong duna nay nakakabit nga plastik diha sa iyang kiliran nga maoy gawsanan sa iyang hugaw tungod sa iya usab nga balatian apan padayon gihapong nag-duty ug nagdawat og suweldo.
Nagsugod ang maong inspeksyon niadtong katapusang semana sa Abril ug gikatakdang matapos karong Hunyo.
Tuyo sa maong inspeksyon mao ang pag-ihap sa gidaghanon sa mga polis ug aron makita ang pisikal nga panglawas sa mga polis.
“Naa tay nadiscover sa Bohol sad nga dili na gyud pwede,in fact dia na diri (gitudlo ang iyang kilid) ang pagawsan sa hugaw niya, i-recommend nato siya nga permanent total disability,” asoy pang Gaquit.
Kun ang usa ka kawani sa PNP marekomendar nga i-permanent total disability awtomatiko kining moretiro pinaagi sa early retirement apan makadawat gihapon sa iyang mga benepisyo.
Samtang gisusi usab sa maong “headcount” kadtong mga polis nga dunay mga kasong kriminal o ba kaha nakumbikto na nga nagdawatan pa gihapon og suweldo.
Bisitahon usab nila kadtong mga polis nga nabilanggo aron pagtino sa ilang kahimtang.
Ang tanang makuhang impormasyon ug dugang kasayuran kabahin sa kahimtang sa pwersa sa kapolisan ipadangat kini sa mga hingtungdang buhatang rehiyonal sa kapolisan ingon man sa kaulohan.