Mohimo og imbestigasyon ang direktor sa Cebu City Police Office batok sa Mabolo police station tungod sa reklamong gipusdakan og telepono sa nakatubag diha sa maong polis station ang biktima sa pagpanglungkab makaduha ka higayon dihang gipangayoan og tabang.
Ang nanawag giilang si Lalaine Durano, administration manager sa Blue Planet sa dalan J. Luna Avenue, barangay Mabolo kinsa sa kadismaya sa pagtagad sa Mabolo adto nalang midangop sa Theft and Robbery Section.
Sa imbestigasyon sa TRS nasuta nga gikawat ang computer printer, CPU ug cassette sa mga gidudahang kawatan nga milungkab sa ilang establisamento human nila kini madiskubrehi kagahapon sa buntag.
Si Sr.Insp. Alexis Relado nagkanayon nga gitawgan sa biktima ang Mabolo police station apan wala pa siya makatug-an sa nahitabo gikatahong gipusdakan siya og telepono sa nakatubag.
Tungod niini iyang giusban og tawag ang maong buhatan aron kuhaon ang pangalan sa polis nga nipusdak og telepono kaniya apan gikatahong giusban kini og pusdak sa nakatubag.
Matud pa ni Sr.Supt. Patrocinio Comendador imbestigahan ang reklamo ug kung dunay sad-an angayan gyud kining silutan.
Dugang pa ni Comendador nga “discourtesy” ang gibuhat sa maong polis.
Subli usab nga gipahimangnoan ni Comendador ang mga presinto nga di mopasa og alarma ngadto sa special unit.
Sumala pang Comendador walay biktima nga ipasa-pasa bisan unsa pa ka gamay sa nalambigit niini.
Apan sa naandan na sa ubang mga police stations, sagad kanila mopasa dayon sa mga biktima diha sa TRS basta naglambigit na og dakong kantidad ang gikawat.
Susama usab sa Homicide Section diin dunay mga polis sa mga police stations nga adto ipasa sa ilang buhatan bisan og mauling alarm ug physical injuries ra ang kaso.
Tungod niini buot mopanday ni Comendador og polisiya nga ikunsiderar nga kalapasan ang pagpasa-pasa sa mga biktima aron masilotan dayon ang mga hingtungdan.
Giawhag usab niya ang publiko sa pagsumbong sa mga susamang kasinatian sa mga kamot sa mga polis.